Mörk, hjúkrunarheimili

Sumarið er loksins komið

Kæru aðstandendur, heimilisfólk og starfsfólk.
Það er komið sumar. Þessa dagana höfum við verið að setja upp garðhúsgögnin á svalirnar og innan skamms koma matjurtakassar þangað líka  og  í  þá munum við  setja niður  mismunandi grænmeti til að rækta í sumar. Við höfum líka af veikum mætti verið að fikra okkur áfram með kryddjurtaræktun og það verður gaman að fylgjast með árangrinum þegar líða tekur á sumarið.  Við hvetjum bæði aðstandendur og starfsfólk til að koma með afleggjara af inniplöntum og gefa á það heimili sem þeim tengist.  Ef þið eigið líka skrautlega blómapotta sem þið eruð ekki að nota þá eru þeir vel þegnir. Þegar verið er að opna nýtt heimili eins og í Mörk er lítið til af svoleiðis hlutum.

Gönguferðir

Við hvetjum aðstandendur til að bjóða heimilisfólki út undir bert loft þegar þeir koma í heimsókn, skreppa í stuttar gönguferðir, það nægir alveg að fara hringinn í kringum húsið ef heimilismaðurinn er of veikburða til að ganga meira. Með hjólastól er hægt að fara  í skemmtilegar gönguferðir um næsta nágrenni.

Tilbreyting

Við könnumst öll við það hversu notalegt það er þegar eitthvað óvænt og skemmtilegt kemur upp í lífi okkar.  Eitthvað sem brýtur upp hversdaginn.  Notum hugmyndaflugið hvort sem það eru aðstandendur, heimilisfólk eða starfsfólk. Hrindum skemmtilegum hugmyndum í framkvæmd.

Breskir og danskir dagar

Undanfarið höfum við verið með daga tileinkaða löndum. Fyrst voru það danskir dagar og svo breskir nýverið í vikunni þegar Vilhjálmur Bretaprins og Kate Middleton gengu í það heilaga. Á kaffihúsinu okkar var hægt að kaupa kaffibolla með dönsku súkkulaði á dönskum dögum og Mackintosh á bresku dögunum. Þá lágu frammi dönsk tímarit á dönskum dögum og á sjálfan brúðkaupsdaginn var haldið heljarinnar partý í húsinu, þar sem allir er vettlingi gátu valdið skörtuðu höttum og dreyptu á sérrítári.

Ef ykkur dettur í hug eitthvað í þessum dúr sem við gætum gert til að brydda upp á í dagsins önn  þá endilega látið okkur vita. Við minnum svo á að virka daga er kaffihúsið okkar á 1. hæð opið og á laugardögum er hægt að kaupa þar nýbakaðar vöfflur  með kaffi- eða súkkulaðibollanum og þá frá klukkan 14 – 17.

Létt messa í Mörk

Sunnudaginn 8.maí kl. 14.00 verður létt-messa í kapellu Markar.  Umsjón með guðsþjónustunni hefur Fjóla Haraldsdóttir djákni. Um tónlistarflutning sér Þorvaldur Halldórsson.
Allir eru hjartanlega velkomnir.

Vöfflukaffi fyrir alla á 1. hæð

Í dag, fimmtudaginn 5. maí,  er kaffisamsæti í salnum á 1. hæðinni í Mörk. Heimilismenn og starfsfólk ætlar að koma saman  af öllum heimilum og hvert heimili sér um að koma með nýbakaðar vöfflur með sér á kaffiborðið.  Með þessum hætti fá heimilismenn tækifæri til að kynnast betur heimilismönnum á öðrum heimilum.  Rúsínan í pylsuendanum er að þær Björg, Signý og Jóhanna, söngkonur og íslenskar dífur, ætla að koma í heimsókn og syngja og skemmta.

Allir aðstandendur velkomnir í félagið

Nýlega var haldinn fyrsti fundur undirbúningshóps að stofnun aðstandendafélags á Mörk. Að lokinni kynningu á fundarmönnum fór fram almennt spjall um hver tilgangur aðstandendafélags ætti að vera. Það er að sjálfsögðu ekki enn fastmótað, ýmsar skoðanir komu fram en menn voru almennt sammála um að það ætti að stuðla að því að skapa gæðastundir fyrir heimilismenn, sem og heimilismanna og aðstandenda saman.

Hópurinn sem stendur að undirbúningi ætlar að byrja á upplýsingaöflun, finna út hvað er gert á öðrum hjúkrunarheimilum, hvernig  fyrirkomulag slíkra félaga er almennt . Tölvupóstföng einstaklinganna í  hópnum fylgja hér á eftir og eru aðstandendur hvattir til að hafa samband og bjóða fram krafta sína eða forvitnast nánar um starfsemina. Netföngin eru:  Þetta tölvupóstfang er varið gegn ruslpóstsþjörkum, Þú verður að hafa JavaScript virkt til að sjá það. ; Þetta tölvupóstfang er varið gegn ruslpóstsþjörkum, Þú verður að hafa JavaScript virkt til að sjá það. ;  Þetta tölvupóstfang er varið gegn ruslpóstsþjörkum, Þú verður að hafa JavaScript virkt til að sjá það.